فراخ على الطريقة الايطاليه

المقادير:

1 كيلو فراخ مخلية

2/1 كيلو بصل +2/1 كيلو فلفل رومي

3 ملاعق دقيق

1 فص ثوم +4/1 كيلو زبد

1 كوب لبن

ملح + فلفل + كاري + توابل



الطريقة :

اغسلي الفراخ و قطعيها مكعبات في حجم مناسب "يعني مثلا القطعة الواحد تكفي قطمتين" و افرمي نص البصل و الفلفل "يعني ربع كيلو بصل و ربع كيلو فلفل" و تبلي الفراخ بالبصل المفروم و الفلفل و معلقتين لبن و فص ثوم مفروم و ملح و فلفل و توابل ،قطعي بقى باقي البصل و الفلفل حلقات او مراوح ،دلوقت ارفعي الفراخ من التتبيلة و شوحيهم في معلقة زبدة بس امسحيهم من التتبيلة كويس قبل ما تشوحيهم بعد ما تخلصي شوحي البصل و الفلفل الحلقات مكانهم و معاه التتبيلة كمان و متنسيش ترشي شوية كاري عليهم و هما على النار .

هاتي بقى حلة واسعة شوية و اعملي فبها كريمة "يعني وايت صوص اللي هوا بشاميل نص سوى"الاول حمري 3 ملاعق الدقيق في معلقتين زبد و لازم تقلبي كويس و بسرعة علشان الدقيق ميتحرقش بس مش قوي مجرد بس ما لونة يبقى وردي حطي باقي اللبن و كوباية او كوباية و نص مية و قلبي بعدين بقى حطي الفراخ و التتبيلة اللي شوحتيها على النار .

الاكلة دي بقى يا بنات رائعة مع المكرونة و نقي كدة نوع غريب و شكلة ملفت للنظر و كمان جميلة مع الارز بس اعملي رز سادة "من غير شعرية يعني"و لونية بشوية كاري و يا سلام بقى لو شوية خضار سوتية

و زي ما اتفقنا دلعي اطباقك يعني نقي الفلفل الوان و البصل كمان بصل احمر و ابيض شوية كسبرة على وش الفراخ و ممكن فركة زعتر و للدلع الجامد بقى اعملي جنبها سلطة بالجبنة البرمازان او الشيدر و رصي شوك و سكاكين على السفرة حتى لو مش متعودين عليها خلية يحس ان النهاردة مش يوم تقليدي و غدا روتيني لا النهاردة انت بتاكل على مائدة السنيوريتا فتكات . بون ابيتيتو