ياريتني كنت القطة

راجع أنت من عملك الساعة 3 العصر في عز الحر لتجد زوجتك صوتها جايب آخر الشارع وهي عمالة تزعق في العيال اللي ولا معبرينها وماسكين في خناق بعض فتطلب منها أن تسارع بتحضير الأكل حتى تستطيع أن تنزل لتلحق بعملك المسائي.

بعد ما كلت ولبست تنظر لساعتك فتجد أنه مازال أمامك ربع ساعة ولأنك طبعا مش هتلحق تنام فتجلس على الكنبة اللي قدام التليفزيون على الأقل تريح جسمك لتجد أولادك يجلسون بجوارك وأحدهم يصيح "هييييييييه هيييييييه أنيمال بلانيت".. "مين يابني؟".. "ده حلو قوي يا بابا"..

- المناظر الطبيعية خلابة وواضح إن فيه اهتمام بجد حتى الحيوانات نضيفة جدا والاعتناء حقيقي وليس لمجرد إن التليفزيون جاي يصور! فهذه القطة مثلا رائعة بحق.. يا سلام لو القطط اللي عندنا كده.. استنى شوية.. إيه ده؟ هم بيعملوا إيه؟ انت يابني ما تفهمني؟
- إيه يا بابا خليني أتابع العملية أحسن دي مسألة صعبة قوي شايف القطة بتتألم ازاي؟
- أيوه يعني هم بيعملوا ليها إيه بالظبط؟
- مش شايف يا بابا القطة صباعها مكسور وهم بيعملوا ليها عملية عشان كده وبعدين هياخدوها عشان فترة النقاهة!
- نقاهة!!!!!!!!! ياريتني كنت القطة..
طب يابني أنا نازل عشان لو اتأخرت أكتر من كده هيرفدوني من الشغل ومش هنلاقي ناكل وابقى طمني إنت بقى على القطة.

*****
يا ترى قريت أو شفت في أي برنامج حكاية الدكتورة "منى"؟
بص يا سيدي دي واحدة بتقول إنها مهتمة بالحيوانات والطيور وعشان كده هي مربية عندها في البيت عصافير على نسانيس على كلاب.. المهم إنهم رفعوا عليها قضية..

مين اللي رفعوا القضية؟ الناس بتوع الجمعية المصرية لحقوق الحيوان.. أما ليه؟ فلأنها سابت الطيور والحيوانات دي في البيت أسبوعين من غير أكل ولا شرب وده تسبب في وفاة الحيونات دي واضطر البوليس إنه يكسر الشقة في عدم وجودها عشان يقدروا يطلعوا الحيوانات..

بعض البرامج الفضائية اهتمت بالقضية وعرضوا وجهتي النظر فالدكتورة "منى" بتقول إنها لم تترك الحيوانات سوى يومين وليس أسبوعين وإنها تركت لهم أكلهم وشربهم أما عن سبب موتهم فيتقول إنه عمرهم حد يقدر يعرف هيموت إمتى! وتتهم رئيس جمعية حقوق الحيوان بتلفيق التهم لها وبإنه مش عايز يديها النسناس بتاعها!

أما رئيس الجمعية فيتهمها بالإهمال وإنها بتتاجر في الحيوانات دي وعشان كده مش مهتمة بيهم وإنه يثق في عدالة القضاء الذي يتحكم في سير القضية الآن!!!!!!

*****
مرارتك اتفقعت.. تعبت نفسيا.. نفسك تطلع اللي جواك بس مش قادر.. أهو أنا برضه حصل لي كده لما شفت الأخت الدكتورة ورئيس جمعية حقوق الحيوان.

أولا دعنا نتفق على أن ما فعلته "منى" هذه جريمة وأنه تعذيب لا يرضى به أحد وأن الحيوان في النهاية روح لا ذنب له في شيء ويجب على أي فرد إذا ما قرر رعايته أن يحسن تربيته ورعايته ولا يهمله ويتعمد تعذيبه.. لكن ألا تتفق معي على أن الأمر مبالغ فيه بعض الشيء..

يعني إذا ما عرضت "أنيمال بلانيت" عملية لقطة مكسور صباعها أو بطة جناحها معوج أو حتى قرد قفاه واجعه فالموضوع عادي وطبيعي لأنهم هناك بيهتموا جدا بحقوق الحيوان زي ما بيهتموا بحقوق الإنسان.. يعني لو حصل تعذيب لأي فرد بتلاقي الدنيا قامت وماقعدتش والمظاهرات خرجت والكونجرس بيناقش القضية وضرورة محاسبة المسئول.. ده لما اتوجهت تهم فساد لم يثبت صحتها بعد لمسئول ياباني انتحر ولما حصل نفس الموضوع مع واحد أمريكي قدم استقالته فما بالك بقى لو حصل اتهام بممارسة تعذيب أو تعمد إيذاء لأي مواطن.. لأن الإنسان ده له حقوق يجب الحفاظ عليها ونفس الشيء بالنسبة للحيوان اللي هو جزء أساسي في حياة الأسرة في الغرب ستجدهم يحسنون رعايته ويحافظون عليه ويهتمون بتغذيته لأنه أصبح مسئولا منه وإذا ما لاحظ أي شخص أن جاره يهمل في كلبه أو لا يطعم حصانه بصورة جيدة فإنه يقوم بالإبلاغ عنه لتأتي مجموعة للتأكد من الأمر والكشف عليه وإذا ما تأكدت صحة البلاغ تتم محاكمة المهمل..

أما أن يحدث الأمر هنا فالموضوع مختلف.. أنت هنا تتحدث عن وطن لا توجد فيه أي حقوق للإنسان يتم احترامها فمن سينظر لحقوق الحيوان! إذا كان الناس مش لاقية الأكل والمية اللي بيشربوها مخلوطة بمياه المجاري وكمان مش لاقيينها، ده حتى رغيف العيش غلي ومش بتلاقيه على طول..

سيبك من الأكل والشرب.. بلاها الأكل والشرب مش احنا بنتكلم في تعذيب الحيوانات كم ممثل وممثلة تم اتهامهم بتعذيب خادمة تعمل لديهم وكيها بالنار وعادوا لممارسة حياتهم الطبيعية واستكمال أعمالهم الفنية وكأن الأمر لا يستحق.. وكم مرة في اليوم الواحد تسمع عن جرائم تعذيب.. بلاش تسمع.. انزل الشارع وشوف الميكانيكي وهو ينظر لـ"بلية" ويصفعه بالقلم على "قفاه" ثم يضحك بشدة.. أليس هذا تعذيبا لطفل كان يفترض أن يكون في مدرسته يتعلم ماهية حقوق الإنسان..

صحيح إن الحيوان له حقوق ولكن بدلا من مناقشة الجريمة التي تم ارتكابها وراح ضحيتها خمس عصافير ومش عارفة كام كلب نناقش قتيل العمرانية.. نناقش الطفل صاحب الاثني عشر عاما الذي تم تعذيبه لغاية لما مات.. نناقش مواطن سيوة الذي تم توصيل الكهرباء لجسده.. نناقش ضحية التلبانة الذي تم سحله.. نناقش الكام مواطن اللي اتفرموا وهم بيتخانقوا على براميل المية.. نناقش الثلاث بنات اللي غرقوا في بركة المية في العبور..

لكن المشكلة إنك في بلد مافيهاش حقوق إنسان فشيء طبيعي جدا إنه مايبقاش فيها حقوق حيوان..

كل ما في يدك أن تفعله أن تجلس أمام التليفزيون لتشاهد ماذا يحدث في أوربا والدول المتقدمة وإنت بتقول في نفسك.. ياريتني كنت القطة