للشباب فقط عايز تبقي روش طحن

يا شباب الروشنة سهلة وجميلة وانا عن نفسي روش وبعشق الموتسيكلات والسباقات والخروج والحياة بالطول والعرض..
بصوا بقي الموضة السنة دي 2007 للشباب والوانها..
التي شيرت : يكون لون سادة وياريت يكون لون فاتح مثلا زي(( ابيض-برتقالي احمر-سمني -بيج)) ويكون حوض الرقبة في التي شيرت واسع ..المهم يكون التي شيرت مطرز فية شئ بسيط مش مبهرج مثلا كلمة او اختصارت حروف زي مثلا انا عندي تي شيرت ((بينك))- بمبي فاتح - مطرز تطريز لامع ((لبني)) والعبارة اختصارت (f.b.i) .. بجد يا جماعة تحفة واقول سر صغير.. كل ما قل التطريز والعبارات كل ما زاد جمال التي شيرت ولا يكون التي شيرت سادة خالص ولا متطرز اوي..دة بالنسبة للتي شيرت.
البنطلون الجينز او الكتان : المنتشر حالا في الاسواق التجارية والمولات الكبري جينز بألون قاتمة او كتان الوان فاتحة لو جينز مثلا ممكن يكون اللون يمشي مع كل الالوان زي ((البلو بلاك)) ودة لون تحفة وفية شغل بسيط بيكون عند الركب اللون باهت شوية ومن تحت عند الشوز بيكون برضة فاتح مع شوية تجعيدات بسيطة -زي ما يكون مكسر من الركب وتحت-..والوان الجينز كلها لون واحد قريب من الغوامق ما عدا شركة واحدة بجون ذكر اسماء طرحت في السوق الوان فواتح بس بصراحة الاقبال عليها مش كبير..
بالنسبة للكتان فدة روعة وانا بحبة جد في ((ابيض-بيج-رمادي)) بيكوني لذاذ جدا علي التي شيرتات اللي نازلة موضة اللي هي فواتح مع فواتح بتخليك منور..جرب وادعيلي انا جربت قبلك والناس معجبة بالالوان.
الشوز او الكوتش : بالنسبة للشوزات او الكوتشات فدة بيرجع للشخصية اللي بتحب نوع عن نوع
بالنسبة لمحبي الشوزات اقدر اقولهم ان الموضة السنة دي هي ((السبيدرين)) او (( السليبر)) ونازلين السنة دي بالوان كويسة واسعار رخيصة يعني ممكن كل طقم بلونة اما لو بتحب الشوز الاسود الجلد فالموضة لسة زي ما هي من 2006 الشوز الاسباني..
بالنسبة بقي لمحبي الكوتشات فاقولهم ان الموضة السنة دي هي الفلات اللي مفيهوش مرتفعات والشغل فية بسيط اوعي تجيب بلزق لأنة موضتة بطلت هات برباط ويكون برضة فية شغل بسيط بس مش لون تاني يعني لو لونة ابيض يكون الشغل اللي فية ابيض ولو بيج برضة الشغل اللي فية بيج وبرضة الموضة فاتح..

لو تيسر اصور الحاجات دي انا واصحاببي اوعدكوا اني هنزل الموضيع بالصور بعد كدة.. واستنوا موضوعي عن البدل اللي تناسب كل المواقف والاكسسوارات الرجالي............

***فهد***