بابا غنوج: الوصفة التي تسببت في بيع محل نعمة الي عم حسني

معروف ان بابا غنوج هو من اشهر السلاطات المصرية على مستوى العالم بعد الطحينة و نطرا لان وصفة الطحينة الجاهزة و التي تباع في الاسواق حاليا قد لاقت نجاحا مبهرا قررنا ان نقدم لكم و لاول مرة وصفة البابا غنوج والتي تسبب تسرب وصفتها السرية الى بيع نعمة الى عم حسني
و البابا غنوج هو عبارة عن خليط من الباذنجان المخلل و الطحينة و يعتبرة البعض وجبة قائمة بذاتها و تقدمة بعض المطاعم الشرقية كطبق رئيسي و ليس كمجرد سلطة
المقادير
اثنان باذنجان رومي " الواحد تقريبا في حجم الكف " 1400-1500 جم
2 بصلة متوسطة 250-300جم
فص ثوم مفروم + نص ليمونة
ملح – فلفل – كمون – شطة
طحينة

الطريقة :
طريقة 1 قومي بشوي البصل و الباذنجان على لهب البوتاجاز " بس طبعا دة هيخلي ريحة البيت حريقة و كمان هتنظفي البوتاجاز في 4 ساعات بعد ما تخلصي "
الطريقة الجامدة : قشري البصل و الباذنجان ، بعدين قطعي الباذنجان حلقات و ابشري البصل او افرمية
تبلي حلقات الباذنجان بالبصل المفروم مع نقطة زيت . لفي الخليط في ورق الومنيوم و اتاكدي انك قفلتي الورق كويس و حطية على النار المباشرة لمدة 10-15 دقيقة "لو عندك مايكروويف حطي الباذنجان و البصل المفروم في علبة ميكروويف محكمة الغلق لمدة 10-15 دقيقة" ، دلوقتي بقى هتقدري تشوي الباذنجان و البصل من غير ما تقلبي ريحة البيت و تهري ايديكي في تنظيف البوتاجاز .
شيلي اللفة من على النار بحرص لانها ممكن تتقطع ، سيبيها تبرد شوية و بعدين افتحي الورق و فضي الخليط في سلطنية و اهرسية بالشوكة او بالمضرب ، اضيفي الملح و الفلفل الاسود و الكمون على حسب الرغبة ، طبعا في ناس كتير مش بتحب الشطة رغم فوائدها الكتير للاعصاب بس انا انصح اننا نحط ولو كمية قليلة من الشطة في السلطات و دة لانها بتظهر طعم الاكل ، اضيفي فص الثوم بعد فرمة و عصير نصف ليمونة جائت اللحظة الحرجة : اضافة الطحينة وهنا يتسائل البعض لية البابا غنوج ساعات بيطلع تقيل قوي وبيلكم ؟ اعزائي المستمعين هنا السر الطحينة وست البيت تقدر تلعب بالمقادير على حسب شكل الخلطة و حالتها يعني مثلا لو احنا في موسم البصل الجديد هتلاقي الخلطة صايصة و مش ماسكة
اما لو كنا في اخر الموسم هتلاقي الخلطة مجبسة و ناشفة استعملي بقى الطحينة و ربع كباية مية و ظبطي الخلطة
متنسيش العين بتاكل قبل الفم يعني دلعي الطبق طمطماية على جنب شوية بقدونس على الاطراف حلقة ليمون ملفوفة في النص