اسرع طريقة لعمل جاتوه في التاريخ

طبعا كلنا -او على الاقل الناس اللي عايشة في مصر- حاسين ان سعر دستة الجاتوة بقى حوالي 3-4 مينيمم تشارج من بتاع كافيهات متوسطي الدخل دة كمان ان ساعات كتير الموضوع مبيكنش مستاهل دستة جاتوة كاملة يعني مثلا 5-6 قطع و الموضوع ينتهي المهم ان اسعار الجاتوة نار و الناس بتشتكي

المقادير :

كيكة سابقة التجهيز و يفضل من نوعية السويس رول او المحشو كريمة "كلنا حوالينا سوبر ماركت او مخابز من الجديدة و من النوعية الايطالية"

مربي "و يفضل من النوع المفروم بمعني انها لا تحتوى على قطع فاكهة "

نوع او اثنين من الفاكهة الموسمية "اختاري النوع الارخص"

هتلاقي عند العطارين و محلات تجهيز المناسبات بودرة كريمة الربع كيلو ب 6-8 جنية و اكتر من كدة متشتريش

و كمان في شيكولاتة "خام لونها اسود قوي"

الطريقة :

اغسلي الفكاهة و قطعيها حتت صغيرة و بعدين اضربي بودرة الكريمة مع كوباية مية ساقعة قوى،

قطعي قالب الكيك /او السويس رول بسكينة مشرشة "خليكي ناصحة و احسبي هيعمل كام حتة علشان ميتهدرش" اخلطي الفاكهة مع الكريمة و احشي بيها طبقات الكيكة .حطي قالب الشيكولاتة الخام على النار مع معلقة زبد او سمن نباتي و ربع كباية لبن و سيبية يغلي ،خلي بالك بقى من الحتة دي علشان دي مهمة قوي حطي معلقة عسل و معلقتين مربي مع الشيكولاتة و هدى النار على الاخر

دلوقت غطي الجاتوة بالكريمة و الشيكولاتة "نص و نص علشان محدش يزعل"

اتفقنا انك لازم تدلعي كل اكلاتك ممكن بقى تعملي خطوط على الجاتوة

خيوط شيكولاتة يالمعلقة على الجاتوة الكريمة .

و سخني معلقتين عسل مع معلقة مية و اعملي خيوط من العسل على الجاتوة الشيكولاتة