مافيش بنت مش بتحتار لما تيجي تشتري فستان سواريه وده لعدة أسباب منها إنها هتدفع في الفستان ده مبلغ كبير جدا وكمان لأنها بتكون عايزة تبان في منتهى الشياكة، وماحدش يكون أشيك منها في الحفلة..

علشان كده بتلاقي نفسك مضطرة إنك تنزلي مرة واتنين وتلاتة تلفي فيهم على محلات السواريه علشان تختاري، وساعات ترجعي البيت إيدك فاضية من غير ما تشتري حاجة ولما حد يسألك ويقول لك ماجبتيش ليه تقولي أصلي مش لاقية حاجة حلوة في السوق بالرغم من إن ممكن يكون فيه حاجات حلوة في السوق..

وساعات تانية بعد ما تلفي وتجيبي فستان وتدفعي فيه دم قلبك وبعد ما تروحي وتلبسيه تحسي إنه مش مناسب ليكِ وإنه فيه حاجة غلط وإنك كان ممكن تجيبي حاجة أحسن من كده بكتير..

إنت عارفة المشكلة فين؟
المشكة إنك مش محددة إنت عايزة إيه بالضبط، ومش عارفة إيه الحاجة المناسبة ليكِ وإيه اللي مش مناسب..

وعلشان تعرفي إيه المناسب ليكِ لازم تاخدي بالك من شوية الحاجات دي قبل ما تشتري الفستان السواريه.

أولا: طبيعة جسمك

يعني مثلا:
• لو كنتِ نحيفة وطويلة
يبقى مش هتحتاري في اختيار الموديل المناسب ليكِ لأنك هتلاقي إن كل الموديلات بلا استثناء لايقة عليكِ وهتكوني مش زي القمر، لا هتكوني القمر نفسه..

• لو كنتِ ممتلئة الجسم وقصيرة
يبقى ياريت تختاري فستان من قطعتين علشان يكون عندك فرصة لتضييق منطقة الخصر والبطن...

وابعدي نهائياً عن الموديلات اللي بتكون "لوويست" أو الموديلات اللي بتكون ضيقة من عند الخصر ونازلة على واسع من تحت لأن الموديلات دي هتبرز عيوب جسمك.

وخدي بالك إن الفستان المنقوش مش مناسب ليكِ لأنه هيظهرك أقصر مما إنت عليه.

• لو كان عندك بطن "كرش"
يبقى ياريت تختاري فستان ضيق شوية من منطقة الوسط ويكون فيه تطريز كتير في المنطقة دي علشان تخفي عيب الكرش ده..

• لو كنتِ ممتلئة الذراع
يبقى ياريت تختاري الفستان اللي كمه واسع وابعدي عن الفساتين اللي كمها ضيق.. كمان بلاش تجيبي فستان (كات) أو بحمالات وتلبسي تحته بادي لأن ده كمان هيبرز ذراعك..

ثانيا: لون بشرتك

حاولي وإنت بتختاري الفستان إنك تختاري الألوان اللي تبرز جمال بشرتك وتفتحها أكتر ودي هتعرفيها وإنت بتقيسي الفستان.. قفي قدام المرايا وشوفي إذا كان لون الفستان ده لايق عليكِ ولا لأ....

بالنسبة لموضة الفساتين اللي نازلة الفترة دي هتلاقي إن:

• بالنسبة للخامات
الخامات المستخدمة هي الشيفون والستان الطبيعي والتول..

• بالنسبة للألوان والتصميمات
فيه تنوع في الألوان والتصميمات فهتلاقي:

الأحمر ملك الألوان في السهرات

تصميم عبارة عن فستان من قطعتين؛ الأولى هي عبارة عن فستان وجاكيت..

الموديل ده يناسب الفتاة اللي مش محجبة واللي محجبة، وده لأن اللي مش محجبة ممكن إنها تلبسه كده لوحده أو تحط عليه شال..

أما لو كنتِ محجبة فممكن إنك تلبسي الجاكيت.

الموف بدرجاته نازل اليومين دول بشكل جامد قوي

وده فستان ستان من قطعتين فستان وجاكت وعليه تطريز من نفس اللون.

الأسود مازال متربعاً على عرش الألوان في السواريهات

بس السنة دي ممكن يدخل معاه ألوان تانية مناسبة ليه علشان تبرز جمال الفستان

الألوان الفسفورية رجعت تاني في تصميمات فساتين السواريه

لو عايزة تبقي متميزة والكل بيبص عليكِ يبقى اختاري الفستان اللي ألوانه زي "الأصفر أو البرتقالي أو الليموني" وماتخافيش الألوان دي رجعت تاني موضة في السواريهات..

واللون الدهبي لسه محتفظ بجماله برضه

لو كنتِ بتحبي الشكل الكلاسيك التقليدي للفستان فده فستان مناسب ليكِ جدا من حيث التصميم واللون كمان..

ده كمان شكل كلاسيك تاني

عبارة عن فستان وجاكيت قصير..

أما لو كنتِ بنت روشة فده تصميم مناسب ليكِ

على فكرة الموديل ده أهم حاجة بتميزه إنه واسع وطويل علشان كده اللي تلبسه لازم تاخد بالها إنها تلبس حذاء بكعب عالي.

ده كمان شكل جديد لسه نازل وفي منتهي الشياكة

أما الموديل ده فكان نازل السنة اللي فاتت بس لسه موجود ومحتفظ بجماله السنة دي كمان

وهنا في موديلات تاني كتير

بس كده خلاص خلص عددنا المرة دي

ولو عجبتكم الموديلات اللي جبناها ابعتوا وقولوا لنا..

ولو مش عاجباكم برضه ابعتوا وقولوا عايزين إيه واحنا نعمله..

وأشوفكم على خير العدد اللي جاي، اللي فيه؟؟؟؟

يبقى استنونا الأسبوع اللي جاي
عايزين تعرفوا فيه إيه